Il Cristal da Pro Infirmis


Pro Infirmis s'engascha per l'inclusiun e l'autodeterminaziun d'umans cun in impediment. Quest onn surdat Pro Infirmis Grischun per la 15avla giada il Cristal da Pro Infirmis. Entant che la distincziun undrava pli baud prestaziuns spezialas d'umans cun in impediment, stattan oz en il center ils umans cun in impediment sezs.


Cun il project da quest onn che sa cloma «Obstachels dal mintgadi» vulain nus, ensemen cun persunas pertutgadas, render attentas la publicitad e la politica als obstachels dal mintgadi da persunas cun in impediment.

La finamira dal Cristal da Pro Infirmis
En il senn dal messadi «Nus n'ans laschain betg impedir» undrescha Pro Infirmis Grischun cun ses Cristal persunas che prestan insatge extraordinari malgrà lur cundiziuns da viver difficultusas. Cun ses premi vul l'associaziun undrar prestaziuns spezialas, far curaschi ad auters umans pertutgads ed – en il cas optimal – dar ad els in impuls da medemamain far ina prestaziun speziala. L'inclusiun e l'egualitad d'umans cun in impediment duai sa chapir da sez en tut ils secturs da la vita. La finamira è da reducir barrieras, da pussibilitar inscunters en il rom da projects ed occurrenzas e da gidar a realisar ideas. La surdada dal Cristal da Pro Infirmis dat als umans pertutgads ina plattafurma per sa preschentar en la publicitad cun tut lur talents e duns.

Il tema actual: obstachels dal mintgadi
Bleras persunas enconuschan ed inscuntran en lur mintgadi obstachels che restrenschan u disturban ellas. Cun il Cristal da quest onn duain umans cun in impediment, lur parents e lur persunas da referiment obtegnair la pussaivladad da render attenta la publicitad a lur obstachels dal mintgadi. Tals obstachels pon vegnir mess online qua. En in segund pass pon vegnir inoltradas – en il rom d'ina bursa d'ideas e d'ina concurrenza – soluziuns pussaivlas per quests obstachels dal mintgadi. Quellas propostas vegnan valitadas d'ina vart d'ina giuria e da l'autra vart da las persunas che han sezzas inoltrà ina contribuziun. La rangaziun da las soluziuns e la surdada dal premi publica han lieu ils 22 da november 2021 en il Titthof a Cuira.

Gruppa accumpagnanta
Ina finamira è prioritara per tut ils projects da Pro Infirmis: integrar umans cun in impediment. Per pudair sviluppar il project «Obstachels dal mintgadi» ha Pro Infirmis creà ina gruppa accumpagnanta. Quella duai cussegliar e sustegnair la gruppa da lavur interna da Pro Infirmis en il senn d'in «accumpagnament tranter pèr». Uschia po vegnir garantì che la vista da las persunas pertutgadas vegnia resguardada en tut ils pass dal project, damai da la planisaziun fin a la realisaziun. La gruppa accumpagnanta sa cumpona da quatter persunas ch'èn pertutgadas da differents impediments.

 

FAQ

Tge chapesch'ins sut obstachels dal mintgadi?
Deplorablamain datti en il mintgadi d'umans cun in impediment blers obstachels, per exempel: Jau na chat nagina lavur che ma fa plaschair. Cun mia sutga cun rodas na vegn jau d'entrar suletta ni en l'auto da posta ni en la Viafier retica. Jau less far part d'in club da sport, na chat però nagin club adattà. Jau tschertg in'amia, però senza success. Mia renta è uschè bassa che jau na poss betg ma prestar vacanzas. Jau n'obtegn nagin sustegn per la tgira da mes figl che ha in impediment, etc., etc.

Tgi po sa participar al project?
Tut las persunas cun in impediment e lur parents pon endatar qua lur obstachels dal mintgadi. En in segund pass – dals 1 da fanadur fin ils 14 da settember 2021 – pon tuts proponer sin la medema pagina-web soluziuns pussaivlas per ils obstachels dal mintgadi inoltrads.

Jau na sai betg co publitgar mes obstachel dal mintgadi sin la pagina-web. Nua survegn jau sustegn?
En cas da difficultads u dumondas generalas pudais Vus As infurmar sut il numer da telefon central da Pro Infirmis 058 775 17 17 ubain cun scriver in e-mail ad alltagshuerden@proinfirmis.ch. Las collavuraturas ed ils collavuraturs da Pro Infirmis As dattan gugent infurmaziuns detagliadas davart il project e co ch'el funcziuna.

Tge premi poss jau gudagnar sco participanta u participant ch'inoltrescha in obstachel dal mintgadi?
Betg ils obstachels dal mintgadi vegnan distinguids, mabain las meglras soluziuns. La finamira dal project è da preschentar a las participantas ed als participants bunas propostas co ch'els pudessan schliar il problem. Questa plivalur duai esser il gudogn.

Tge premi poss jau gudagnar cun ina buna soluziun pussaivla?
La persuna che persvada cun la meglra soluziun pussaivla gudogna il Cristal da Pro Infirmis e grazia a la surdada dal premi publica obtegna ella era la stima correspundenta.

Tgi decida tgenina ch'è la meglra soluziun pussaivla?
Las soluziuns vegnan giuditgadas en duas categorias. D'ina vart valitescha ina giuria las propostas e fa ina glista da rangaziun. Da l'autra vart vegnan las propostas valitadas era da las persunas che han sezzas inoltrà ina contribuziun che descriva in obstachel dal mintgadi. Questas duas glistas da rangaziun independentas ina da l'autra gidan ad eruir la victura u il victur dal Cristal da Pro Infirmis da quest onn.

Tgi sesa en la giuria?
La giuria sa cumpona da persunas pertutgadas, da spezialistas e da represchentants da la politica ed economia. Da la giuria da quest onn fan part:

  • Mario Cavigelli, president da la Regenza
  • Martin Candinas, cusseglier naziunal e president da la cumissiun chantunala da Pro Infirmis Grischun
  • Doris Mery, collavuratura da Pro Infirmis
  • Roman Brazerol, manader dal Post spezialisà per la construcziun senza obstachels
  • Annalis Jost Komposch, interprendidra
  • Dina Schmid, manadra da la gruppa accumpagnanta e pertutgada
  • Romano Seglias, represchentant da l'economia e pertutgà


Tgi fa part da la gruppa accumpagnanta?
La gruppa accumpagnanta sa cumpona da:

  • Dina Schmid, manadra
  • Erwin Graf
  • Barbara Schumacher
  • Joel Thurneysen


Co poss jau ma participar?
Ils singuls pass vegnis Vus a savair qua:
Sa participar

 

I funcziunescha uschia

Pass 1: Voss obstachel dal mintgadi
Fotografar, filmar u descriver cun in curt text l'obstachel dal mintgadi.

Pass 2: Inoltrar l'obstachel dal mintgadi
Inoltrai Voss obstachel dal mintgadi* tranter glindesdi, ils 3 da matg e mesemna, ils 30 da zercladur 2021 directamain per e-mail ubain WeTransfer, sche la datoteca duess esser memia gronda. Uschespert che nus avain retschet Voss obstachel dal mintgadi, tramettain nus a Vus in e-mail da conferma.

*Voss obstachel dal mintgadi vegn publitgà anonimamain.


WeTransfer:

  • Avrir la pagina-web e tscherner la versiun gratuita
  • Agiuntar la datoteca cun cliccar sin «+» ubain trair il document giavischà directamain en la mascra
  • Endatar sco «E-mail a» alltagshuerden@proinfirmis.ch e sco «Tia e-mail» Vossa atgna adressa dad e-mail
  • Sche Vus vulais, pudais Vus scriver a nus in pèr lingias sut «Messadi»
  • Cliccar sin «Trametter»
  • WeTransfer trametta uss a Vus in code da segirezza per e-mail. Quel stuais Vus endatar en la mascra per pudair trametter la datoteca a nus.


Pass 3: Soluziuns pussaivlas
A partir da gievgia, ils 1 da fanadur 2021 chattais Vus tut ils obstachels dal mintgadi inoltrads en la rubrica «Contribuziuns» sin nossa pagina-web. En la funcziun da commentari pudais Vus endatar soluziuns pussaivlas* per ils obstachels dal mintgadi. Vossa soluziun pussaivla pudais Vus inoltrar fin mardi, ils 14 da settember 2021.

*Vus pudais inoltrar ina u pliras soluziuns era senza che Vus avais endatà sez in obstachel dal mintgadi. Las soluziuns vegnan publitgadas cun il num da quella u quel che las ha proponì.

Pass 4: Valitaziun da la giuria e surdada dal premi
Las propostas vegnan silsuenter valitadas d'ina giuria e da las persunas che han inoltrà in obstachel dal mintgadi. La rangaziun da las soluziuns e la surdada dal premi publica han lieu ils 22 da november 2021 en il Titthof a Cuira.


nach oben